မြန်မာနိုင်ငံမှာ နှစ်ပေါင်း၆၀ တိုင်အောင် ၀ါဒမှိုင်းတိုက်အမှောင်ပိတ်ပြီးစစ်တပ်ကို ခေါင်းပေါ် တင် ထားရအောင် ကျေးဇူးတင်နေဖို့ ရေးထားတဲ့စာတွေ ကိုဖတ်ခဲ့ရတယ်။ အဓိပ္ပါယ်ဘာမှန်းတိတိကျကျ မသိတဲ့ အချုပ်အခြာအာဏာ ဆိုတာကြီးနဲ့ ကမ္ဘာတည် သရွေ့ အုပ်ချုပ်ချင်ကြတဲ့ စစ်ဝါဒီတွေနဲ့နီးစပ်မှ အလုပ်ဖြစ်အဆင်ပြေရတဲ့ တိုင်းပြည်မှာ၊ ဗုဒ္ဓ၀င်လာ ဇါတ်တော်တွေ ကို ရုပ်စုံ၊ အသံစုံ ဖတ်ရှု နားထောင်ရင်းကြီးပြင်း ခဲ့ကြရတယ်။ လွန်ခဲ့တဲ့ နှစ် ၁၀၀ လောက်က ၀တ်စားဆင်ယင်မှုကို မြန်မာမှု ယဉ်ကျေးမှု အဖြစ်စံ ထား ကြ တယ်။ သာအေးနဲ့ စာဥတို့ဆိုတာ မြန်မာနား မှာ ယခုတိုင် ယဉ်ပါးလို့။……..ခေတ်မီဆဲ။ပြောစရာ ပြစရာ ခေတ်မီနည်းပညာမရှိ၊ ခေတ်မီအဆောက်အဦးမရှိ၊ တီထွင်မှုနတ္ထိ ဖြစ်နေခဲ့တဲ့
တိုင်းပြည်မှာ လှည်းယာဉ်ကလေးနဲ့ ကျော့ကျော့နှင်…နေခြင်းက ယဉ်ကျေးမှု ကိုထိန်းသိမ်းတဲ့ ဒို့မြန်မာလို့
အော်ကြပြန်တယ်။ ကျနော်ဆိုလိုတာက မြန်မာ့ယဉ်ကျေးမှုကို သေးသိမ်စေလိုခြင်းမဟုတ်ပဲ၊ စစ်ဝါဒီ အမှောင်ပိန်းကို ရိုးရာယဉ်ကျေးမှုဆိုတဲ့ ကောက်ရိုးမျှင်တွေနဲ့ ဖုံးကွယ်တာကို ပြောလိုခြင်းဖြစ်တယ်။ အမှန်
တရားကို ယခုတိုင်လက်ခံရကောင်းမှန်းမသိဖြစ်နေတဲ့ စနစ်ကိုပြောလိုခြင်းဖြစ်တယ်။
ဘာသာခြားတွေက ဝေဖန်ကြတယ်။ ငါးပါးသီလ ရဟန်းသီလတွေအပြင် ကြီးသူကိုရိုသေ၊ ရွယ်တူ ကိုလေးစား၊ငယ်သူကိုသနားဆိုတဲ့နီတိတွေနဲ့ကြီးပြင်ကြတဲ့ မြန်မာမှုတွေဟာအနောက်တိုင်းယဉ်ကျေးမှု
ဖြစ်တဲ့ လူ့အခွင့်အရေးစံနှုန်းတွေထက် အများကြီး မြင့်တယ်။ ကမ္ဘာမှာ ထေရ၀ါဒ ဗုဒ္ဓဘာသာကို အဓိက ကိုးကွယ်ယုံကြည်ကြတဲ့ မြန်မာနိုင်ငံမှာ တိုင်းပြည် ဦးသျှောင်ကနေ ဆေးရုံစောင့်အဆုံး လာဘ်စား ကြတယ်။ ခိုးဝှက်ကြတယ်။ ရိုးသားတဲ့မြန်မာဆိုတာ အပြင်လောကမှာမရှိဘူး။ ဗုဒ္ဓဘာသာကို အစဉ် အဆက် ကိုးကွယ် သလို အစဉ်အဆက် ခိုးစား၊ လိမ်စားတဲ့ လူမျိုးလို့ သမုတ်ကြတယ်။ ရှက်လိုက်တာ။
နိုင်ငံတကာငွေကြေးတွေမှာ တိုင်းပြည်နဲ့ လူမျိုးအတွက် ပေးဆပ်ခဲ့တဲ့ လူပုဂ္ဂိုလ်တွေရဲ့ပုံတွေကို ထုဆစ်ပုံဖေါ်ပြီး ဂုဏ်ပြု သုံးစွဲကြတယ်။ မြန်မာနိုင်ငံမှာတော့ အဟိတ် တိရိစ္ဆာန် ခြင်င်္သေ့ပုံနဲ့ ဆင်ပုံတွေကို ထည့်သွင်းထားကြတယ်။ မြန်မာနိုင်ငံမှာ မြန်မာ့သမိုင်းမှာ တိုင်းပြည်အတွက် ပေးဆပ်ခဲ့သူတွေမရှိကြလို့ လားလို့ စဉ်းစားစရာတွေဖြစ်ကုန်တယ်။
ရှိတာပေါ့။ “ငါတို့ကျွန်မျိုးမဟုတ်ဘူး။ ကြောက်လျှင်ပြန်၊ ရဲလျှင်ကြံ” သာမန်ပုလိပ်တစ်ယောက်
ကိုတောင်မှ ဖိန့်ဖိန့်တုန်အောင်ကြောက်နေရတဲ့အချိန်၊ သခင်ခေါ်နေရတဲ့ ဗြိတိသျှခေတ်မှာ မြန်မာနိုင်ငံကို အုပ်ချုပ်နေတဲ့ ဘုရင်ခံ ဂရက်ဒေါက် ကို “ဂရက်ဒေါက် ဂက်အောက်” လို့ သတင်းစာ က ပြောဆိုခဲ့တဲ့ မြန်မာ့လွတ်လပ်ရေးမီးရှူးတန်ဆောင် ဆရာတော် ဦးဥတ္တမ လို ပုဂ္ဂိုလ်တွေရှိခဲ့တယ်။ ဆရာတော်ဟာ လွတ်လပ်ရေးမျိုးစေ့ချခဲ့သူအဖြစ် သတ်မှတ်ထားကြတယ်။
နောက်တစ်ယောက်က ဘ၀တစ်ခုလုံးကို မြန်မာနိုင်ငံ လွတ်မြောက်ရေးအတွက် အပင်ပန်း အဆင်း ရဲခံခဲ့တဲ့ ဗိုလ်ချုပ်အောင်ဆန်း လို ပုဂ္ဂိုလ်မျိုးတွေရှိခဲ့တယ်။ မြန်မာနိုင်ငံအတွက် ကျေးဇူးကြီးမားတဲ့ ဒီပုဂ္ဂိုလ် တွေရဲ့ပုံတွေကို စစ်အာဏာရှင်အဆက်ဆက်က မေ့ပစ်ခဲ့ကြတယ်။ လွတ်လပ်ရေးရပြီးစ ခေတ်မှာ
ဗိုလ်ချုပ်အောင်ဆန်း ဓါတ်ပုံအချို့ကို ငွေစက္ကူတွေမှာ ရိုက်နှက်ခဲ့ကြတယ်။ ၁၉၈၉ နှစ်ကစပြီးတော့ မြန်မာငွေစက္ကူတွေပေါ်မှာ တိရိစ္ဆာန်ပုံတွေကိုပဲ ထည့်သွင်းလာခဲ့ပါတော့တယ်။
ထိုင်းငွေစက္ကူတွေပေါ်မှာ သူတို့လေးစားတဲ့ ဘုရင့်ပုံတွေကို ရိုက်နှက်သုံးစွဲကြတယ်။ ထိုင်းဘုရင်ကို ဘုရားတစ်ဆူလို ထိုင်းလူမျိုးတွေ ကိုးကွယ်ကြတယ်။ သူတို့တိုင်းပြည်အတွက် ကျေးဇူးရှင်
အဖြစ်သတ်မှတ်ထားကြတယ်။
ထိုင်းနဲ့မြန်မာကွာခြားမှုတွေအများကြီးရှိကြပါတယ်။ ထိုထိုများစွာ ထဲမှာ ကျနော် ထိုင်းတွေကို အလေးစား လို့မဆုံး အတုယူလို့မဆုံးတာ၂ ချက်ရှိပါတယ်။
(၁) အချက်……..
ထိုင်းလူမျိုးတွေဟာ လမ်းသွားရင်း အမှိုက်ပစ်တာ၊ တံတွေးထွေးတာလုံးဝမရှိဘူး။ အမှိုက်ပုံးကို မတွေ့မချင်း
သူတို့လက်ထဲက အမှိုက်ကို ပစ်ချလေ့ မရှိဘူး။
(၂) အချက်….
ညနေ၆နာရီ ထိုးတိုင်း ထိုင်းတစ်နိုင်ငံလုံးမှာ နိုင်ငံတော်သီချင်းကိုဖွင့်ပါတယ်။ ဒီသီချင်းကို အစိုးရရုံးတွေမှာ ဖွင့်ရုံသာမက ဈေးမှာရော၊ ကားဂိတ်လိုနေရာမျိုးတွေမှာပါ အကုန်လုံးဖွင့်ပါတယ်။ ဒီသီချင်းလာတဲ့အခါ
ထိုင်းလူမျိုးတွေဟာ အကုန်မတ်တတ်ရပ်ပါတယ်။ ရောင်းဝယ်ဖေါက်ကားနေတာတွေအားလုံးကို ရပ်ပစ် လိုက်ပါတယ်။ အဲဒီသီချင်းဆုံးအောင် ရိုရိုသေသေ ငြိမ်သက်စွာရပ်နေကြပါတယ်။ သီချင်းဆုံးမှ အလုပ်တွေ ဆက်လုပ်ပါတယ်။ နေ့တိုင်း နေ့တိုင်း ထိုင်းလူမျိုးတိုင်း တနိုင်ငံလုံးမှာ လိုက်နာလုပ်ဆောင်ကြပါတယ်။
မနေ့က အာအက်ဖ်အေ ရေဒီယိုမှာ ကြားလိုက်ရပါတယ်။ အာဇာနည်နေ့မှာ ဥသြဆွဲဖို့အတွက်
အစိုးရက ပယ်ချသတဲ့။ ကောင်းကြရော့ဗျာ။ မြန်မာနိုင်ငံအတွက် တန်ဘိုးဖြတ်မရအောင် ကျေးဇူးကြီးမား
ကြတဲ့ အာဇာနည်ခေါင်းဆောင်ကြီးတွေကို တစ်နှစ်ပတ်လုံးမှ အဲဒီနေ့ အဲဒီအချိန် (ဇူလိုင်၁၉ ရက် နံနက်
၁၀ နာရီ ၃၇ မိနစ်) မှာ တစ်မိနစ်ကလေးတောင် မြန်မာအစိုးရက ဂုဏ်ပြုလေးစားရကောင်းမှန်း မသိသေး
တာ ကိုတော့ အတော်အံ့သြမိတယ်။ဖါး၊ ဖုံး၊ ဖိ၊ ရသမျှရှာနေရတယ်ဆိုတဲ့အာဏာ ရှင်ခေတ် နေ၀င်ချိန် အတ္တလောဘသားတွေကြား ထဲမှာ သူရဲကောင်းအာဇာနည်တွေရဲ့ အခန်းကဏ္ဍ ကတော့ ပျောက်နေအုံးမှာပဲ။ တစ်နှစ်လုံးမှာ ဇူလိုင် လ ၁၉ ရက်နေ့ အာဏာနည်တွေအတွက် တစ်မိနစ် ကလေး ဂါရ၀ါပြုဖို့ ၀န်လေးနေကြတုန်းဆိုတာကို သိလိုက်ရတော့ကျနော်တို့ အထူးစိတ် မကောင်းဖြစ် ကြရတယ်။ စိတ်ထားတွေမတိုးတက်သရွေ့၊ မြင့်မြတ်သူတွေကို ရိုသေရကောင်းမှန်းမသိသရွေ့တော့ ကျနော်တို့ တိုင်းပြည်ဟာ ကျေးဇူးကန်းရူးနှမ်းတဲ့ တိုင်းပြည် ဖြစ် နေအုံးမယ်။ ခိုင်းမှလုပ်တတ်တဲ့သူတွေအဆင့်က မကျော်နိုင်။
မသမာသူတွေလုပ်ကြံသတ်ဖြတ်မှုကြောင့် တိုင်းပြည်ရဲ့အဖိုးတန်အာဇာနည် သူရဲ ကောင်းကြီး တွေ ဆုံးရှုံးခဲ့ကြရတယ်။ မိသားစုနဲ့ ထပ်တူ တတိုင်းပြည်လုံး ၀မ်းနည်းကြေးကွဲကြတယ်။ ဒီပုဂ္ဂိုလ်တွေ ကွယ်လွန်ခဲ့တဲ့အတွက်ပညာမဲ့တဲ့အုပ်ချုပ်သူတွေလက်ထဲကို မြန်မာနိုင်ငံရောက်သွားခဲ့ရတယ်။ဒီပုဂ္ဂိုလ်လ်
တွေ လွတ်လပ်ရေးရပြီးနောက်ပိုင်းမှာ တိုင်းပြည်ကို အုပ်ချုပ်စီမံခွင့်ရရှိခဲ့ရင် ကျနော်တို့ မြန်မာနိုင်ငံရဲ့ ကံကြမ္မာ ဟာ ဒီလောက်ထိ စုတ်ပြတ်သတ်စရာမရှိဘူးလို့ မြန်မာတစ်မျိုးသားလုံး ယုံကြည်ထားကြလို့ဖြစ် တယ်။
သတင်းစာဆရာကြီး ဘဘ ဦးဝင်းတင် စကားနဲ့အဆုံးသတ်ရရင် “မဆလ ခေတ်မှာတောင် အာဇာ နည်နေ့မှာ ဥသြဆွဲခဲ့သေးတယ်။ စစ်အစိုးရလက်ထက်မှာမှ ရပ်ပလိုက်တာ။ အဲဒါကိုကျနော်တို့တောင်းဆိုနေ တာ။ အခုကျနော်တို့ တတိုင်းပြည်လုံး ထောင်ကျနေသလားလို့ထင်ရတယ်။ မြန်မာနိုင်ငံဟာ ယခုထက်တိုင် စစ်အာဏာရှင်အုပ်ချုပ်ဆဲဖြစ်တယ်။ စစ်အစိုးရရဲ့အကျင့်စရိုက်တွေအမူအကျင့်တွေ၊ အကျင့်အကြံ တွေက မခွာနိုင်ဘူး ဆိုတာကိုပြတဲ့ နောက်ဆုံးသက်သေတစ်ခုပဲလို့ပြောလိုတယ်”။ ။
ကျော်သောင်း
No comments:
Post a Comment